काठमाडौं । मंगलबार साँझ बालुवाटारमा प्रधानमन्त्री शेरबहादुर देउवा र एमाले अध्यक्ष केपी शर्मा ओलीबीच ‘वान टु वान’ वार्ता भएको जानकारीमा आएको छ।
प्रधानमन्त्री देउवालाई भेट्न अध्यक्ष ओली मंगलबार साँझ तीन एमाले नेतासहित बालुवाटार पुगेका थिए। उनको साथमा एमाले वरिष्ठ उपाध्यक्ष ईश्वर पोखरेल, उपाध्यक्ष बिष्णु पौडेल र उपमहासचिव बिष्णु रिमाल थिए।
कांग्रेसको तर्फबाट प्रधानमन्त्री देउवासहित उपसभापति पूर्णबहादुर खड्का र सूचना तथा सञ्चार मन्त्री ज्ञानेन्द्रबहादुर कार्की थिए।
बैठक सकिएपछि साँझ सबै नेताले सामान्य कुरा भएको र कुनै प्रगति नभएको प्रतिक्रिया दिए। मिडियामा एमाले होस् वा कांग्रेस सबै नेताले एउटै बोली बोले। सबैले भने, ‘प्रधानमन्त्रीले एमसिसीमा एमालेको सहयोग माग्नुभयो। एमाले अध्यक्ष ओलीले पहिले आफ्नो पार्टी संसदमा भाग लिने वातावरण मिलाउनु पर्यो भन्नुभयो।’
कांग्रेस र एमाले पछिल्लो एक सातादेखि लगातार संवादमा छन्। गएको शुक्रबार प्रधानमन्त्री देउवा पत्नी आरजुसहित ओली निवास बालकोट पुगेका थिए। त्यसयता दुई दलका नेताहरूबीच लगातार भेटघाट र संवाद भएका छन्। त्यसैले ओली र देउवा बालुवाटारमा भेट्दा एकजनाले ‘एमसिसी पास गर्न मद्दत गर्न सहयोग मागे र अर्काले हामीले संसदमा भाग लिने वातावरण मिलाउनु पर्यो भने, त्यसबाहेक अरू कुरा भएन’ भन्ने भनाइ पत्यारिलो थिएन। सबै नेताले जसरी एक स्वरमा एउटै प्रतिक्रिया दिए त्यो पनि पत्यारिलो थिएन।
