हरेक वर्षको चैत्र शुक्ल नवमीका दिन श्रद्धा र भक्तिपूर्वक रामको पूजाआराधना गरी मनाइने रामनवमी पर्व आज मनाइँदैछ।
आज देशभरका राम मन्दिरमा विशेष पूजा आराधना गरी मनाउने परम्परा छ । आजका दिन व्रत बसी रामको पूजापाठ र जप ध्यान गर्नाले चिताएको कार्य पूरा हुने विश्वास रहिआएको छ।
पितृ मातृ भक्त, ठूलालाई आदर र सानालाई माया गर्ने आदर्श पुरुषका रुपमा रामले अयोध्यामा राज्य गरेकाले उहाँको शासनकाललाई अहिले पनि रामराज्यका रुपमा स्मरण गरिन्छ । सृष्टिमा दुर्जनको अन्त्य गरी सज्जनको रक्षाका लागि भगवान् विष्णुले रामका रुपमा मनुष्यलोकमा जन्म लिएको धार्मिक विश्वास छ।
राम नवमीका अवसरमा काठमाण्डौको बत्तीसपुतलीमा रहेको राम मन्दिर, पशुपति आर्यघाट पारिको राममन्दिर लगायत देशभरका राम मन्दिरमा भक्तजनहरुको विशेष घुइँचो लाग्ने गर्छ । आजको दिन जनकपुरको रामजानकी मन्दिरमा विशेष मेला लाग्छ ।
यसैबीच, राम नवमीका अवसर पारेर आज सरकारले सार्वजनिक बिदा समेत घोषणा गरेको छ।
