काठमाडौँ — नेकपा एमाले अध्यक्ष केपी शर्मा ओलीले शेरबहादुर देउवा कहिले पनि फ्रेस निर्वाचनबाट निर्वाचित प्रधानमन्त्री नभएको बताएका छन् । काठमाडौंमा शुक्रबार आयोजित एमालेको तर्फबाट निर्वाचित स्थानीय तहका जनप्रतिनिधिहरुलाई सम्बोधन गर्दै अध्यक्ष ओलीले देउवा जहिले पनि जालझेल र तिकडमबाट मात्रै प्रधानमन्त्री भएको बताए ।
‘शेरबहादुरजी फ्रेस चुनाव जितेर कहिले पनि प्रधानमन्त्री हुनु भएको छैन । पार्टीभित्रको जालझेल वा संसद्भित्रको जालझेल वा अदालतमा पुगेर गरिने जालझेल होस् । जालझेल र तिकडमबाट मात्रै शेरबहादुरजी अहिलेसम्म प्रधानमन्त्री हुनु भएको छ,’ अध्यक्ष ओलीले भने, ‘२०५२ भदौ १२ गते एमालेको लोकप्रिय सरकारविरुद्धको अदालतको फैसलामा पनि शेरबहादुर देउवालाई जिताइएको थियो ।’
उनले एमालेबाहेक दलहरुसँग कुनै पनि विषयमा नीति नभएको जिकिर गरे । ‘अन्य दलको राष्ट्रियताको विषयमा नीति के हो ? वैदेशिक सम्बन्धबारे नीति के हो ? वैदेशिक सहायता वा ऋणको सन्दर्भमा के हो ?,’ ओलीले प्रश्न गरे ।
विभिन्न विषयमा अन्य दलले नीति बनाउन नसकेको तर एमालेका नीतिबारे टीकाटिप्पणी गर्ने गरेको उनको आरोप थियो । उनले आफूहरूले लिएको नीतिले वैकल्पिक राजनीतिक, आर्थिक र वैदेशिकसम्बन्धी नीति दिन सक्ने तर अन्यले तोडमोड गरेर विकृत पार्ने गरेको बताए । ‘एमालेबाहेक कुनै पनि पार्टीसँग नीति छैन । सोच छैन, राष्ट्र निर्माणको सोच के त ?’ ओलीको प्रश्न थियो ।
