मधेश बाहेकका प्रदेशका विभिन्न ठाउँमा अहिले पानी परिरहेको छ । कोशी र बागमती प्रदेशमा हल्कादेखि मध्यम पानी परिरहेको जल तथा मौसम पूर्वानुमान महाशाखाले जनाएको छ ।
महाशाखाका अनुसार गण्डकी, लुम्बिनी, सूदुरपश्चिम र कर्णाली प्रदेशमा भने हल्का पानी परिरहेको छ । पछिल्लो १ घण्टामा सबैभन्दा धेरै काठमाण्डौको सुन्दरीजलमा रहेको धाप ड्याममा २७ दशमलव ४ मिलिमिटर वर्षा मापन भएको छ । यस्तै ललितपुर, मकवानपुर, मोरङ, इलाम, मुगु, बझाङ, दार्चुलालगायतका जिल्लामा पनि पानी परेको छ ।
आज राति कोशी, बागमती र मधेश प्रदेशमा ठूलो पानी पर्ने सम्भावना रहेको मौसमविद् हरि दाहालले बताउनुभयो ।
यसैबीच वर्षा र बाढी पहिरोका कारण देशका विभिन्न ठाउँमा सडक अवरुद्ध छन् । सङ्खुवासभाको भोटखोला गाउँपालिका–४ वरुणखोलामा बाढी आएकाले खाँदबारीदेखि थुमसुर जाने कोशी राजमार्ग पूर्णरूपमा अवरुद्ध रहेको प्रहरीले जनाएको छ ।
यस्तै सिन्धुपाल्चोकको लार्चामा रहेको अरनिको राजमार्गको भोटेकोशी खोलामा बाढी आउँदा पूर्णरूपमा अवरुद्ध भएको सडकमा साना गाडी आवतजावत गर्ने गरी चलेको छ । ठूला गाडी भने बेलिब्रिजकाे भारवहन क्षमता जाँच भएपछि मात्र चल्ने प्रहरीको भनाइ छ ।
